خودا لەسەر زەوی فورقانێکی دانا!
خودا لەسەر زەوی فورقانێکی دانا!
چیتر جیهان یەک پارچە نییە؛ ئاوێنەی بوون شکاوە و ئێستا هەموو شتێک بە سەر دوو بەرەدا دابەش بووە: بەرەی غـ.ـەززە و، بەرەی ئەوانەی سەیری غـ.ـەززە دەکەن.
ئێمە لێرە، ژیانمان بووەتە مردنێکی هێواش؛ جەستەکانمان بوونەتە گۆڕی ڕۆحمان.
لەوێ، مردنیان بووەتە ژیانێکی ڕەها؛ دوا هەناسەیان، دەبێتە شاهیدییەک لە بارەگای خوادا کە هەموو مێژووی پڕ لە شەرمەزاریی ئێمە دەگێڕێتەوە.
ئێمە لێرە، لە پشت پەردەی نیعمەتەکانەوە کوێر بووین؛ نیعمەت بووەتە حیجاب لە نێوان ئێمە و حەقیقەتدا.
لەوێ، لەناو ئاگر و دووکەڵدا، هەموو پەردەکان سووتاون و ئەوان بە چاوی ڕۆح، حەقیقەتی ڕەهای بوون دەبینن.
ئێمە لێرە، لە نان گەرووماندا دەبێتە خۆڵەمێش، چونکە تامی خوێنی ئەوانی گرتووە.
ئەوان لەوێ، برسێتییان کردووە بە ڕۆژوو، بە نوێژێک کە ڕاستەوخۆ دەگاتە عەرشی خودا.
ئێمە لێرە، لەناو میحرابی ڕازاوە و فەرشی نەرمدا خودا ون دەکەین. ئەوان لەوێ، لەسەر خۆڵی گەرم و بەرماڵی سووتاو بە خودا دەگەن.
ئێمە لێرە، گیرۆدەی وەهمی سبەینێین و ترسی داهاتوویەکی نادیار، ئەمڕۆمانی لێ تاڵ کردووین. ئەوان لەوێ، قیامەتیان کردووە بە دیداری یەقین و مردن لە لایان، دڵنیاترین بەڵێنی خودایە.
ئێمە لێرە، کاتێک منداڵەکانمان دەگرین، دونیای بۆ دەشڵەقێنین. ئەوان لەوێ، منداڵە شەهیدەکانیان ماچ دەکەن و بە ڕۆحێکی ئارامەوە دەیان سپێرن بە خودا، دەڵێن: "ئەمانەت بوویت و گەڕایتەوە بۆ لای خاوەنەکەت."
ئێمە لێرە، وشەکانمان وەک ژاوەژاوێکی بۆش، لە هەوادا ون دەبن. ئەوان لەوێ، یەک ئاهی سکی برسییان، یەک (حسبنا الله ونعم الوكيل)ـیان، دەبێتە زریانێک کۆشکی ستەم دەهەژێنێت.
ئێمە لێرە، لە ژیانێکی پڕ لە نیعمەتدا، هەست بە مردنێکی ڕۆحی دەکەین. ئەوان لەوێ، لە مردنێکی پڕ لە شکۆدا، ژیانی ئەبەدی بەدەست دێنن.
بۆیە غەززە چیتر شوێن نییە.
غەززە، فورقانە.
حوججەی خودایە بە سەر درۆی ئێمەدا.
ئاوێنە نییە تا لێی بڕوانین، بەڵکو دادگایە! ئێمەی تێدا ڕاوەستاوین.
برین نییە تا ساڕێژ بێت، بەڵکوو شاهیدێکە کە تا ڕۆژی مەحشەر، گەواهیدەری شەرمەزاریی ئێمەیە.
ئەو پرسیارەی ڕۆژی حەشرە، کە لێرە لەسەر زەوی لێمان دەکرێت و، بێدەنگیی ئێمە، وەڵامە گوێکەڕەکەیەتی!
ئەمە ژیان نییە؛ ئەمە بەرزەخە، چاوەڕوانییە
چاوەڕوانیی حوکمی ئەم فورقانە.
سناء محي الدین