کەرامەت و کەسایەتیی تاک چی پێوە ماوە؟

کەرامەت و کەسایەتیی تاک چی پێوە ماوە؟


دونیای نوێ ئەو دونیایەیە کە زۆرترین جار گوێبیستی کارامەت و پاراستنی کەسایەتی و مافی تاک دەبین، بەڵام لە هەمان کاتدا؛ زۆرترین جار کەرامەتی مرۆڤی تێدا دەشکێندرێت، یەکێک لەو لایەنانەی لە تەواوی جیهان بە گشتی بڵاوە، بابەتی کامێرەی شاراوەیە، لە ئێستاشدا بابەتەکە لەوە دەرچووە کەناڵێکی ڕاگەیاندن، یان لایەنێکی فەرمی هەستێت بە ئەنجامدانی ئەو کارە، بەڵکوو هەر کەسە و هەڵدەستێت موبایلێک دادەنێت و بە دڵی خۆی سوکایەتی بە بەرانبەرەکەی دەکات، هەستی ئەبزوێنێت، ئەیترسێنێت، جلوبەرگەکەی پیس دەکات، بە دەیان و سەدان شێوەی جۆراوجۆر خۆت و کەسوکارت دەکەونە نێو ئەو سیناریۆ نزمانەوە، دەیان میکانیزم بەکار دەهێنن هەتا وا بکەن بەرانبەر زۆرترین کاردانەوە بنوێنێت، چونکە بۆ ئەوان باشترە، ڤیدیۆکەیان بینەری زیاتری دەبێت.


زۆر دیمەنم بینیوە لەو ساتەدا هاووڵاتییە ئاساییەکە کە ئاگاداری هیچ نییە، کاردانەوەیەکی توندی نواندوە، جا چ لە کوردستان یان وڵاتانی دەرەوە، ئەوەی جێگای سەرنجە بینیومە زۆرێک سەرزەنشتی هاووڵاتییە ئاساییەکەیان کردووە، بۆچی ئەو کاردانەوەیە دەنوێنیت؟! باشە خۆ کامێرەی شاراوەیە! ئاساییە، بابەتەکە بۆ خۆشییە. لێرەدا پرسیارە جەوهەرەیەکە ئەوەیە: کێ ڕێگەی داوە هاووڵاتی و یاریکردن بە کەسایەتی کەسێک بکرێتە بابەتی سەرگەرمی و دڵخۆشیی کەسانی تر؟ کاتێک من بەڵێ من، خۆم ڕیگا نادەم کەس یاری بە کەسایەتیم بکات، چۆن و بە چ پێوەرێک دەبێت بکرێمە بابەتی ڕابورادن و هەزەلیات بۆ خەڵک؟ کێ ئەو مافەی بەم و بەو بەخشیوە؟ بە ڕاستی ئەم بابەتە هیچ کات جێگای قبووڵکردن نییە، جا هەر ناوێکی لێ دەنێیت، بابەتێکی پوچە و لە دڵی پوچگەرایی و بێ کەرامەتییەوە سەر دەردەهێنێت.


 کەسێک ئەگەر ڕێز لە کەسایەتی خۆی بگرێت ئامادە نییە سوکایەتی و بێڕێزی بە کەسانی تر بکات، بەبێ ئاگاداریی و لە پڕدا کەسێک بخەیتە نێو مەوقیفێکی ناخۆشەوە، دواتریش بێیت و بڵاوی بکەیتەوە، دەنگێکی پێکەنینیشی بخەیتە سەر! بۆ مرۆڤ خۆ بوکەڵە و کەرەستەی دڵخۆشکردنی خەڵکی نین، مرۆڤ مەیموونی نێو سێرک نییە بە دڵی خۆت یاری پێ بکەیت و پێی ڕابوێریت. مرۆڤ کەرامەتی هەیە، کەسایەتی هەیە، بۆچی لەم سەردەمی سۆشیاڵمیدیا و بەتاڵییەدا، کەسێکی خاوەن کەسایەتی بکرێتە بابەتی ڕابورادن و سوکایەتی پێ بکرێت؟ ئەمە ئەگەر وازمان لە هەموو لایەنە نەرینی و ناشرینەکانی تری کامێرەی شاراوەشمان هێنا، تەنها پارێزگاری لە کەسایەتی و کەرامەتی مرۆڤ بەسە کە هەموو ئەو بەرنامە و تاقیکردنەوانە ڕابگیرێت لە تەواوی دونیادا.


ئاڤار قەرەداغی


#ئاستانە_Astana

8/25/2025 2:27:33 PM