ڕۆژووگرتن لە زیندانی سامناکی «فۆچا»
ڕۆژووگرتن لە زیندانی سامناکی «فۆچا»
«بیگۆڤیچ» لە درێژەی گێڕانەوە نایابەکەی خۆیدا دەربارەی ماناکانی ڕۆژوو و نهێنییەکانی و کاریگەرییە ئەرێنییەکانی کە پێویستە لە واقیعی تاک و کۆمەڵدا ڕەنگ بداتەوە، بەپێی ئەزموونی کەسیی خۆی لەسەر ڕۆژوو، دەڵێت: "کاتێک نزیکەی شەش ساڵم لە زیندانی «فۆچا» بەسەر برد، لە نێو دیوارە بڵند و مێڵە ئاسنینەکانیدا، تووشی خەمۆکییەک بووبووم کە لەم جۆرە بارودۆخانەدا تووشی مرۆڤ دەبێت و ئازاری دەدات. کاتێک خواردنم باش دەخوارد، هەستم دەکرد حاڵم خراپتر دەبوو، بەڵام برسییەتی یارمەتی دەدام و بەردەوام و باشتر لە هەر شتێکی تر ورەی بەرز دەکردمەوە، چونکە بەتاڵیی ڕۆح و پڕیی گەدە یەکێکە لە خراپترین جۆرەکانی بێنەزمی.
بۆچی بابەتەکە بەم جۆرەیە؟ بیرکردنەوە لەمە ڕەنگە ببێتە هۆی دەرخستنی موعجیزەی ڕۆژوو، کە دەتوانین بە توانای بڵندی مرۆیی ناوی بنێین، لەبەر ئەوەی مرۆڤ و ئاژەڵ دەخۆن و خۆیان تێر دەکەن، بەڵام تەنیا مرۆڤ دەتوانێت بەڕۆژوو بێت. کەواتە ئەگەر خۆراک ببێتە تەواوکەری پێویستبوونی چەند یاسایەکی سروشتی، ئەوا ڕۆژوو باڵاترین دەربڕینی ویستە. واتە لە ڕوانگەی منەوە کردەی ئازادییە، هۆکارە تەندروستییەکان مەبەستی سەرەکیی ڕۆژوو نین."
#ئاستانە_Astana