ئەرێ ژ ڕاست ب یەکسانییا جێندەرییێ، خێزان دهێتە پاراستن؟! وەکی فێمێنیستێن کوردستانێ بەحس دکەن!
ئەرێ ژ ڕاست ب یەکسانییا جێندەرییێ، خێزان دهێتە پاراستن؟! وەکی فێمێنیستێن کوردستانێ بەحس دکەن!
پشتی دەمەکێ بێ دەنگی و شەرمزاریێ ل ئاست و هەولێن وان یێن شکەستن ئینای، پشتی خۆلێکدانا و کۆمڤەکرنا وان پشتی کو هاتنە دەرکرن و دیرئێخستن ژ خواندگەهـ و زانکۆ و ناڤ بازاڕێن کۆمەلگەهێ، کۆمەکا فێمێنیستان ب ناڤێ هەڤپەیمانییا ژنێن کوردستانێ کۆنگرەیەکا ڕۆژنامەڤانی گرێددەن، ب تنێ د چەند خۆلەکێن کێمدا چەندین شاشیێن مەزن دکەن -دگەل چاڤنقاندن ژ شاشیێن ڤەخواندنا بەیاننامەیا وان- کو ب ڕۆهنی دژبەری و نەڕۆهنی و خۆ بدەرەودەرئێخستن دیاردبیت. ڤێجا ڤان خاتینان -کو ب کرنەبەرا ڕاپێچا جۆرێ هەوریێ وانا دڤێت مۆرەکا ئاشنایانە و ڕەسەن ل ناڤێ کۆمەلا خۆ بدەن- هەر ب ڕاستی ئاگەهداری پرسا ڕەگەزی و پەیماننامەیێن نیڤدەولەتی نینن- ب تایبەتی پەیمانا سیداو کو ئەو ب خۆژی ئاماژەی پێ دکەن-؟! یانژی خەلکی و کۆمەلگەهێ ب بێئاگەهـ حساب دکەن و وەسا هزر دکەن هەما هوسا سادە و ب سەناهی دێ باوەریێ پێ ئینن -د دەمەکی دا ئەوان ئەڤ ئەزموونە نەبوویە-؟!
ئێک ژ ڤان هەردوو پرسێن سەیر کو ئەڤڕۆ ئەڤ ژنە ل کۆنگرەیا ڕۆژنامەڤانییا خۆدا داخواز دکەن، بریتینە ژ بجهئینانا یەکسانییا ڕەگەزی د کۆمەلگەها کوردی و پاراستنا خێزانێ! بەحسکرنا ڤان هەردوو پرسان ئاماژەیەکا ڕوونە ب گۆهوڕینا گوتارا فێمێنیزم و مێگەرییێن کوردی کو بەری نووکە سەنتەرێ کارێ وان بەحسکرنا یەکسانییێ دناڤبەرا ژن و زەلاماندا بوو، خۆ ئەگەر پەیڤا ڕەگەز ژی بکارهینابا ب هەمان شێوە هەڤڕامانا دوو ڕەگەزێن بایلۆجی بوو، بەلێ نوکە پرسا ڕەگەزی ئەو ژ ڤەشارتنا بەری نووکە یا دەرکەفتی، ڤێجا ئەگەر فێمێنیستێن کۆمەلگەها کوردی ب تمامی د ڕامانا ڕەگەز گەهشتبن و هێشتا بەردەوامبن ل بانگەشەکرنێ، ئەڤە کارەساتە و دڤێت هەر زووی ڕێک لێ بهێتە گرتن و تاکان ژ ڤان کەمپینێن پیس هشیار ببیت. هەروەسا ئەگەر نزانن ڕەگەز سەیوانەکا چەوایە و چ ل بن سیبەرا خۆ کۆم دکەت، ئەڤە کارەساتەکا مەزنترە و کۆمەلەک یێن بۆیە زمانحالێ ژنان، کو ژ بلی نمایشا ئیعلامی و دەنگ بلندکرنا وان ل سەر کلتوور و ڕەخنەگرتنا وان ل ئایینی، شیانا تێگەهشتن و هویربینییێ نینە ژ وی چەمکێ بانگەشەیێ بۆ دکەن و ژ وێ ڕێکەفتنامێ ژی کو شانازییێ پێ دبەن.
داخوازییەکا سەیرتر ژداخوازیا یەکسانییا جێندەرییێ؛ داخوازیا پاراستنا خێزانێیە و وەکی یا دیار ژێدەرێ ئەڤێ داخوازییێ ترسە ژ کارڤەدانا خەلکی دژی دەستدرێژی کرنا پیرۆزییا و بلندییا خێزانێ و ڤەشارتنا مەرەمێن دیترە ل پشت ئەڤێ داخوازییێ، ئەگەر نە کی هند یێ گێژ و ساویلکەیە یەکسانییا جێندەر و ڕێککەفتناما سیداو و پاراستنا خێزانێ پێکڤە کۆم بکەت؟! ب ئەگەرێ یەکسانییا جێندەری خێزان نەبەس هەلوەشیایە، بەلکی چەندین شێوازێن دیژی ژێ دروست بووینە (هندە ژێدەر بەحس ل هەبوونا ۱۲ جۆرێن جیاوازێن خێزانێ دکەن) کو چ تشت وەکی خێزانەکا سرووشتی نینە و نەماییە (ئەو خێزانا ژ نێر و مێ دروست دبیت) ئەڤ خێزانە ب دەهان و سەدان ئاریشە و نەخۆشی و دەستدڕێژی و شکاندنا کەرامەتا مرۆڤی و ژبەربرنا زارۆکان و هـ ـەڤـ ـرەگـ ـەز بـ ـازان و خێزانا فرە زەلام و فرە ژن و ... چەندەها جۆرێن دیتر هینایە هەبوونێ کو خێزان ژ بنیاتڤە هەلوەشاند، ئێدی چەوا ئەڤ ژنێن کو بووینە هەڤپەیمانیێن ئێکودوو دشێن ب ڕێکا یەکسانییا جێندەری خێزانێ بپارێزن؟ ئەسلەن چەوا دشێن ئەڤان دوو پرسەیان ئەوێن د بنیاتدا دژی ئێکن پێکڤە گرێبدەن؟!
ئەڤە ژبلی کو ڕێککەفتناما سیداو ئێکە ژ ڕێککەفتنامێن کو هەتا نووکە ئەمریکا نەڤێت بەندێن وێ ل وەلاتێ خۆ جێبەجێ بکەت، چونکی ئەو هزر دکەن کو بەندێن وێ پەیمانێ دژی پاراستنا ڕەوشا خێزانێیە و کۆمەلگەهێ بۆ ئاقارەکێ باش نابەت، ئێدی چەوا ئەڤ ژنە دهێن و وان دڤێت ب ڕێکا دوو ڕێکێن سەرەکیێن لێدان ژ خێزانێ وەسا نیشا مە ددەن کو گەلەک خەما پاراستنا خێزانێ دخۆن و کار بۆ دکەن؟ ئەڤ جۆڕە دژبەری و پێکڤە نەگونجانە، سەرەڕای متبوون و بێدەنگییا وان ل ئاستێ توندوتیژییێن ماوەیێ بووری کو ل بەرانبەر کوشتنا کچەکا تەمەن ۱٥ سال ژ لایێ بابێ وێڤە د سەر یاسایێدا و ئالۆدە و دوور ژ بهایێن ئەوی ئایینی یێن ئەڤە ل دژی وی د ڕاوەستن، د هەمان دەمدا خۆکوشتنا کچەکا دی ژ خەمێن هەژاری و چەندەها کەیسێن دیتر کو ئەڤان ژنان و هەڤپەیمانێن وان دەستی بۆ نابەن و خۆ ژێ ددنە پاش.
#ئاستانە_بادینی #Astane_badînî