شەرمزابوونا ئێكەم دژمنێ ئیسلامێ د ڤی سەردەمیدا
شەرمزابوونا ئێكەم دژمنێ ئیسلامێ د ڤی سەردەمیدا
-بەشێ چارێ-
دکتۆر "فازیل سولەیمان" بەرپرسێ دەزگەهێ پرد بۆ نیاسینا ئێسلامێ دبێژیت: ل ساڵا 2019 دا ژ لایێ ئافرەتەکێڤە کۆمێنتەک ل فەیسبوکی بۆ من هات، تێدا نڤیسیبوو، ژ ئەگەرێ ڤیدیویەکا تە ئەز یا بویمە موسڵمان، ئەز بخۆ مەسیحیەکا عێراقی بووم و ئەڤە بۆ دەمێ دەهان ساڵانە دگەل دایک و بابێن خۆ ل وەڵاتێ ئەڵمانیا دژیم. بابێ من گەلەک ب ڤیانڤە گوهێ خۆ ددا گوتارێن قەشە "زەکەریا بوتروسی". بابێ من گەلەک کەیف خۆش ببوو دەمێ قەشە زەکەریای د بەڕنامێ خۆدا گوتبوو موحەمەد نە کوڕێ عەبدللەیە و دەیکا وی ژنەکا دەهمەن پیس بوو، بۆ من گەلەک نەخۆش بوو کو جوداهییا هزر و عەقیدەی بگەهیتە ئاستێ توهمەت پێکرنێ، هەر کەسەکێ تشتەک هەبیتن بلا ب ئەدەبڤە بێژیت، ئەرێ ما ئەگەر عیسا (سلاڤ لێ بن) دژیانێ دابا، دا ب ڤێ چەندێ ڕازی بیت؟ بێگومان نەخێر. ئەڤێ چەندێ وەل من کر کو د وێ شەڤێدا نەنڤم و ل دویڤ وێ خەلەکا بەڕنامێ قەشە زەکەریای بگەڕهم و دویڤچوونێ بۆ بکەم. من د لێگەڕیانا خۆدا ل یوتیوبێدا گوتارەکا تە دیت کو بەرسڤەک بوو بۆ ئەوێ توهمەتێ. پشتی من گوهێ خۆ دا گوتارا تە و یا ویژی، هەر د وێ شەڤێدا، من موسلمانبوونا خۆ ڕاگەهاند.
ئەو خەلەکا کو خوشکا من بەحس دکەت ئێکەم ڤیدیۆیا تۆمارکری بوو ل یوتیوبی کو من تێدا بەرسڤا ئەوی قەشەی دابوو، د وێ گوتارێدا پشتی کو من بەرسڤا گومانێن وی داین و بەلگە و ڕاستی بەرچاڤ کرن، ئەڤجا من بزاڤ کر کار لسەر هەست و سوزێن بینەران بکەم، داکو بشێن بڕیار بدەن بەرەڤ ئایینێ ئیسلامێ بهێن، من گوت: ئەرێ ما هوین قەبویل دکەن توهمەت ب وی کەسی بهێتە دروستکرن ئەوێ د پەرتوکا بۆ وی هاتیە هنارتن (36) جاران ناڤێ خاتینا مەریەم هاتیە و سورەتەک ب تەمامی ب ناڤێ وێ هاتیە ناڤکرن، د دەمەکێ دا کو ناڤێ هەڤژینا فیرعەونی و شاهژنا سەبەئێ نەهاتیە، هەروەسا ناڤێ هەڤژینێن وی و کچێن ویژی د قورئاندا نەهاتینە.
قورئان ل پشتی نێزیکی شەش سەدەیان ژدایکبوونا مەسیحی یا هاتیە فڕێکرن، دەهمەن پاقژییا خاتینا مەریەم دسەلمینیت، ل بلنداهیا حەفت ئەسمانان بەحسێ "عیسا"ی دکەت دەمێ ژیێ وی بتنێ ئێک ڕۆژ و ب موعجیزەیا خودێ ئاخفت و پاقژییا دەیکا خۆ سەلماند.
#رێکخراوا_ئاستانە