ستەمکرن ل مەزنترین پروسەیا بەخشینێ!
ستەمکرن ل مەزنترین پروسەیا بەخشینێ!
زێده‌تر ژ ٣٥٪ ژ گۆشتێ عه‌لۆكێن سه‌رژێكرییێن جه‌ژنا سوپاسداریێ ل ئه‌مریكا، ل دوماهیێ دهێنه هاڤێتن بۆ ناڤ گلێشی، ترسا ڤێ ژماره‌یێ د ده‌مه‌كێدا ده‌ردكه‌ڤیت ده‌مێ دزانی كو ژماره‌یا عه‌لۆكێن سه‌رژێكری دوێ جه‌ژنێدا ساڵانه نێزیكی «پێنجی ملیۆن» عه‌لۆكانه! به‌لێ به‌روڤاژی د جه‌ژنا قوربانییێدا، هه‌می تشتێ قوربانییێ مفا ژێ دهێته وه‌رگرتن و دهێته بكارئینان هه‌تا هری و پیست و شاخێن وێ ژی!
د جه‌ژنا سوپاسداریێ دا گۆشتی ناده‌نه هه‌ژاران، به‌روڤاژی جه‌ژنا قوربانێ كو ساڵانه دبیته مه‌زنترین پڕۆسه‌یا تێركرنا هه‌ژاران ل جیهانێ. دگه‌ل ڤێژی، لاف لێده‌ر و پۆز لێدەر و فشەکەرێن ل ده‌ف مه‌ژی پێكۆڵا كرێتكرنا دروشمێ قوربانیکرنێ دده‌ن ژ ئه‌گه‌را شاشیێن هنده‌ك كه‌سان د ماوه‌یێ ئه‌نجامدانا پڕۆسه‌یا قوربانیكرنێدا.
ئه‌رێ ئایین ڤان شاشیان قه‌بیل دكه‌ت؟ یان ته‌مامی ب به‌روڤاژی وێ ئایین خه‌لكی هاندده‌ت كو ب باشی پڕۆسه‌یا سه‌ڕبڕینێ ئه‌نجام بده‌ن هه‌تا وی ڕاده‌ی كو پێتڤییه كێرك بهێته ڤه‌شارتن ژوی گیانه‌وه‌ری یێ كو دێ هێته سه‌رژێكرن داكو نه‌تڕسیت. ژبه‌رهندێ فه‌ره ئاراسته‌كرن ب وی شێوه‌ی بیت خه‌لكی هانبدەت و پاڵبده‌ت كو پابه‌ندبن ب وان فێركاریێن ئایینی د پڕۆسه‌یا قوربانیکرنێدا، نه‌كو كرێتكرنا هه‌می دروشمی و وه‌سفكرنا ڕۆژا جه‌ژنێ ب شێوه‌یه‌كێ كو ژ كه‌سه‌كێ ناهێت كو خۆ ب موسڵمان بزانیت!
ب به‌حسكرنا په‌ز و بزنا، فێمینیست و لیبراڵی و ئه‌و فێمینیسته هاتنه بیرا من كو خۆ ددانن موسڵمان. دێ بینی كو فێمینیسته‌ك یا دبێژیت: "ئیسلام یا دادپه‌روه‌ره به‌رامبه‌ر ئافره‌تێ، به‌لێ موسڵمانان زولم یا لێكری." ماده‌م وه‌سایه بۆچی تو ڤان موسڵمانان گازی ناكه‌ی بۆ پابه‌ندبوونێ ب ئیسلامێ ل جهێ هندێ تو یا لسه‌ر هزره‌كا رۆژئاڤای كو زۆرینهیا هزر و بیڕوباوه‌رێن وان بته‌مامی ل دژی ئایینینه؟
ب هه‌مان شێوه ئه‌و چه‌پ ولیبراڵییێن موسڵمان یێن كو دبێژن بنه‌مایێن چه‌پڕه‌وی (چه‌پگەری) و لیبڕاڵییه‌تێ تێكناچن دگه‌ل فێركاریێن ئیسلامێ، ئه‌رێ بۆچی تو ب هندێ رازی نابی بتنێ ب موسڵمان وه‌سفا خۆ بكه‌ی؟ بۆچی توو خۆ ب چه‌پ و لیبراڵی ددانی د ده‌مه‌كێدا د بنه‌ره‌تدا و زۆرینهیا هزرێن ته ژ نه‌موسڵمانانه؟
ئه‌ز بته‌مامی تێدگه‌هم ژ پێتڤییا مفا وه‌رگرتن ژوان میكانیزم و ئالاڤان یێن كو شارستانیه‌تا رۆژئاڤا گه‌هشتیێ، ئه‌ڤه هه‌مان ئه‌و تشته یێ كو هه‌می شارستانیه‌تێن ژ نوی پێگه‌هشتی دگه‌ل شارستانیه‌تێن دامه‌زراندی دكه‌ن، به‌لێ «میکانیزم و ئالاڤ» تشته‌كه و «بنەما و بیروباوەڕ» تشته‌كێ دیه. ئه‌گه‌ر تو بنه‌ما بیڕوباوه‌ڕان ژوان وه‌ربگری، ئه‌و توو شارستانیه‌تا خۆ ئاڤاناكه‌ی، به‌لكوو بتنێ تو درێژكه‌ره‌كێ شارستانییه‌تا وانی!
عه‌لی موحه‌ممه‌د
#ئاستانە_بادینی #Astane_badînî