قورئانخوێنێ ئەهلێ دلی!
قورئانخوێنێ ئەهلێ دلی!
ئەوا کو مەنشاوی سینگێ مە پێ دهنجنیت، دەنگێ وی یێ نازک و دلۆڤان نینە، شارەزاییا وی یا حێبەتکەر د تۆن و لەرزین و مەقام و ئاوازاندا نینە، ئەوا ئەو ڕحا مە پێ ماندی دکەت، ئەو ئیمانا ڤەشارتییە ئەڤا ژ گەوریێ دگەل پیت و لەرزینا واندا دەردکەڤیت، سینگێ ب قورئانێ فرەهکری ژ دەنگەکێ خەمگینڤە دکەتە هەوار، دەرونێ هەڕشی ساخ دکەت، باوەر د دەنگڤەدانا ویدا وەکی وی گەنمییە یا ل سەر ئاگری لڤین دکەڤیتێ، ئەڤە ژبلی هندێ جوان وێنەکرنا وان پیتێن ژ ژێدەرێن خۆ یێن تەمام دەردکەڤن.
وەکی ئەو بخۆ دبێژیت: پێغەمبەر (علیه الصلاة و السلام) هاتە خەونا من و گۆت مەنشاوی تۆ ب هەمان ڕەنگێ خواندنا من قورئانێ دخوینی، ئەی هەڤاڵ بەرێ خۆ بدێ، مەنشاوی نە بتنێ ئایەتان دخوینیت، بەلکوو ئەو ڕاڤەکەرەکێ دی یێ قورئانێیە، دەقان ژ رویەکێ دیڤە شرۆڤەدکەت، تەماشە بکە وان چیرۆکێن دخوینیت د گەوریا ویدا بتنێ د چوارچووڤهیێ دەق و نڤێسینێدا نامینن، بەلکوو دیمەنەنان دئینیتە بەرچاڤێن تە ب بەرزی و نزمیا تۆنا و خەمگینبوونا دەنگێ وی یێ خەمگین ل جهێ خۆ، تە دکەتە بینەرەکێ ڕاستەوخو بۆ ڕویدان و دیمەنان.
ئەرێ تە چ جارا گوهدارییا چیرۆکا مەریەمێ نەکرییە ب دەنگێ وی یێ سەرنجڕاکێش و دڵڕاکێش؟ ببینە کا چ شلوڤە دکەت بۆ دیمەنێن ڤێ سورەتێ، گوهداریا وێ بەرسڤا مەریەمێ بۆ جبریلی بکە، گوهبدێ دەمێ خوزییا ڕادهێلیت بۆ مرنێ و ژبیرکرنا وێ بەری ڤی بچیکێ کەتییە زکێ وێ بۆ هندێ دا حەقیێ بدەتە نیاسین بۆ کۆما مرۆڤێن ئێخسیر و نەساخ، گوهبدە ژانێت زارۆکبوونا وێ، سەحبکە کارلێکا بەردەواما مەنشاوی و شەرمینییا حالێ مەریەمێ د ڕەوشەکێدا خەلکەک ژ مەریەمێ دپرسن ئەی خوشکا هاروونی نە دەیکا تە لەشفرۆش بوو و نە بابێ تە ژی یێ خراپکار، ئەڤە چ زاروکە دگەل تە؟ سەحکە وان هەمی شلاقێت ئافرەتەک دخۆت پێخەمەت جەهالەتا مرۆڤان، ببینە چ قوربانیەکێ بۆ مرۆڤایەتیێ ددەت، ئەرێ پا مە چ کرییە؟ ئەرێ ئەم ژهەژینە خودێ کارەکێ مە ب ڕەوا ببینیت؟
ئاە... تە چ جارا گوهێ خۆ دایە دەنگێ ھاتنا خودێ ل سەر پێغەمبەرێ خۆ ب دەنگێ مەنشاوی؟! ل دەمەکی خێزانێت وی وەک مەزنێ ئوممەتەکێ گلەیی و گازندەیا ژ ڕەوش و بێ جهی و ڕێ و برساتییا خۆ دبەنە لایێ وی، د دەمەکێدا کیسرا و ئیمبڕاتورێن دی ل سەر تەختا دنڤستن و د ئامانێن زێڕ و زیڤیدا دخوار و ڤەدخوار و دکۆچکێن خەیالییێن ئاسێدا دژیان، وەی خودێ چ دبێژیت، چ قورئانسازەک وی وێنەی جوان دکەت؟
وەکی شێخ بن باز دبێژیت مەنشاوی دەنگەکە ژ بەهەشتێ، دبێژیت: "هەکە تە بڤێت گوهـ ل قورئانی ببی و بزانی کا چەوا هاتییە خوار، هینگێ بتنێ گوهدارییا محمد صدیق المنشاوی بکە، چونکی چ دەنگ نینن هەڤبەری دەنگێ وی بیت!! ئاخر دەنگێ مەنشاوی وەکی ئاڤەکا پاقژ و زەڵالە کو تێهناتیێ دشکێنیت."
گوهداریا دوماهیکێن سوڕەتا حەشر بکە، وەکی سعد الغامدی دبێژیت: "چ جارا نەبوویە من گوهدارییا دوماهیکێن ڤێ سورەتێ کربیت ب دەنگی مەنشاوی و من نەکربیتە گری." ئاهـ مەنشاوی چ مەخلوقە ئەی هەڤاڵ. ئەی خودێ مەنشاوی چەندێ بێڕەحمە؟! ئەو تێنەبیت قورئان بخو یان ژی گۆتنێت ئیبنولقەیمی هندە وەکی جەللادەکی ل نەفسا من دابیت، من وەسا ماندی بکەن، هوسا گیانێ من بهەژینن و لەشێ من وەسا لاواز بکەن، کو د ناڤ پاس و بازاڕ و جهێن گشتیدا، د موحازەرێن زانکویێ ژیدا روندکێت من پێ بڕێژن.
دانیاڵ ژاکاو
#ئاستانە_Astana