هەموومان چیرۆکی ئەو پیاوەمان بیستووە کە دەیەوێت پارەکانی لە بیابانێکدا بشارێتەوە، بۆیە سێبەری پەڵەهەورێک دەکاتە ناونیشان. بەڵام کاتێک دەگەڕێتەوە بۆ شوێنەکە، دەبینێت هەورەکە نەماوە و سەرمایەکەی بزر بووە و مایەپووچ بووە!
ئەم پیاوە دەبێت لۆمەی کێ بکات؟! هەورەکە کە سروشتی وایە جێگیر نییە و با دەیبات، یان عەقڵی خۆی کە درکی بەو سروشتە گۆڕاوە نەکردووە و پشتی بە شتێکی کاتی بەستووە؟!
لەوانەیە ئەو پیاوە بە نەزان و گەمژە بزانین، بەڵام ئەگەر بە قووڵی بڕوانینە واقیعی خۆمان، دەبینین زۆرینەمان هەمان ڕەفتار لە کایە هەرە گرنگەکانی ژیانماندا دووبارە دەکەینەوە. ئێمە گەورەترین سەرمایەمان کە مانا و ئامانج و ئاراستەی ژیانمانە، دەدەینە دەست کۆمەڵێک بیردۆزی مرۆڤکرد و مۆدەی فکری و فەلسەفەی بەتاڵ و زانستی گۆڕاو، کە ڕێک وەک سێبەری ئەو هەورە خێرا تێدەپەڕن و کاتین.
مرۆڤ کاتێک پشتی لە وەحی کرد و بڕیاری دا حەقیقەتە ڕەهاکان و مانا باڵاکان لە فەلسەفە و بیردۆز و زانستە مرۆییەکان وەربگرێت، خۆی لەنێو گێژاوی هیچگەراییدا بینییەوە. هیچگەرایی پێی گوت کە بوون لە بنەڕەتدا هیچ مانا و ئامانجێکی نییە، مرۆڤیش تەنیا دەرەنجامی ڕێکەوتێکی بایۆلۆژییە. بەڵام لەبەر ئەوەی مرۆڤ لە ڕووی سایکۆلۆژی و ڕۆحییەوە ناتوانێت بەبێ مانا بژی، هەوڵی دا خاڵێکی جێگیر بدۆزێتەوە بۆ ئەوەی ژیانی پێ ئاراستە بکات. لێرەوە کەوتە ناو تەڵەی پووچگەرایی، کە هەوڵ دەدات مانایەکی ڕەها لەنێو شتە ڕێژەیی و کاتییەکاندا دروست بکات. سەرمایەی ڕۆحی دەباتە ژێر سێبەری هەوری زانستپەرستی و سەرمایەداری و چێژگەرایی و، پێی وایە ئەم سێبەرە کاتییانە دەتوانن جێگەی ئاراستە نەگۆڕەکەی بۆ پڕ بکەنەوە. بەڵام ئەم تیۆری و فەلسەفە هەورییانە بەردەوام لە گۆڕانکاریدان. زانست تیۆرییەکانی پێشووی خۆی ڕەت دەکاتەوە (چونکە سروشتی زانست وایە بۆ لێکۆڵینەوە و خزمەتی ماددەیە نەک وەڵامدانەوەی پرسیارە وجوودییەکان)، مۆدێلەکانی چێژ و سەرمایەداری زوو کاڵ دەبنەوە و، دروشمە سیاسی و کۆمەڵایەتییەکان لەبەردەم یەکەم قەیرانی واقیعیدا هەرەس دەهێنن.
کاتێک هەوری ئەم ئایدۆلۆژیایانەش ڕادەماڵرێت، مرۆڤ دەگەڕێتەوە بۆ هەمان خاڵ و دەبینێت سەرمایەکەی ون بووە و لەناکاو خۆی لەژێر باری قەیرانی دەروونی و دڵەڕاوکێ و خەمۆکی و هەستی تەنیاییدا دەبینێتەوە. بۆیە دەبینین تا دێت ڕێژەی خۆکوشتن و نەخۆشییە دەروونییەکان و هەستی بێهوودەیی زیاتر دەبێت؛ چونکە خەڵکانێکی زۆر تەمەنیان لەژێر سێبەرێکدا وەبەرهێنان کردووە کە لە بنەڕەتدا بوونێکی جێگیری نەبووە.
مرۆڤ کاتێک متمانەی خۆی دەداتە دەست فەلسەفەیەک کە مرۆڤێکی عەقڵسنووردار و کەموکووڕ دایناوە، یان ئاراستەی ژیانی دەبەستێتەوە بە تیۆرییەکەوە کە سبەی گۆڕانکاری بەسەردا دێت، نائومێدبوونی دەرئەنجامێکی حەتمی و چاوەڕوانکراوە. سا بۆ ئەوەی سەرمایەی ئامانج و مانا و ئەخلاق بزر نەبێت، پێویستە پشت بە خاڵێکی جێگیر ببەسترێت کە کات و شوێن نەیگۆڕێت. ئەم خاڵە جێگیرەش هەرگیز ناتوانێت ئایدۆلۆژیا و بیرۆکەی مرۆڤی سەر زەوی بێت کە خۆیان بەشێکن لە گۆڕانکارییەکان، بەڵکوو دەبێت ڕەگێکی میتافیزیکی و نەگۆڕی هەبێت؛ واتە پشتی بە سەرچاوەی وەحی بەستبێت کە لە سەرووی گۆڕانکارییەکانی مرۆڤ و سروشتەوەیە.
سناء محی الدین
#ئاستانە_Astana
- دیزاینەر
- موحەممەد ڕەسول

- ئامادەکار
- ئاستانە

- بڵاوکەرەوە
- گەشبین




